فـــــــــقرات حـــــــــــــــــــــــلمنتيشية

يالودكى العزيز صاحب قصيد (فوزية)
زول (شيل جردلك)ان شاء الله خاتى اذية
العيد السعيد ماتلقى فيــــــــــــهو رزية
لا تقاسى الصـــــعاب ,, لاشرية الترزية
الودكى1)
يجزيك رب العباد بى سؤالك عنى
ياحمدى الاصم هباش مراتع الجنى
بى شعرك دوام هابش مواضع فنى
الا العيد والقصيد من زمن كجنى
الودكى (2):
قصيد فوزية والتجدع داك
حليل زمنو وحليلو حالى غناك
استنيت بت حلالك مشيتلا براك
والمكتول فى المثل مابسمع الكوراك
المتنرفز:
مكتول الغرام كوراكو دايماً عالى
وانا مكتول كمد شايل هموم طوالى
لا فرحاً يدوم لا زول يحن فى حالى
جافونى الصحاب حاربنى عمى وخالى

االودكى:
[ حمدى الحميدة خسايلو فى كل مجمع
حمدى أتجيك قافيتو ترعد وتلمع
وكتين اشوف الجكس اطرح واجمع
يتغابى العرفة فيك لابشوف لا بسمع

المتنرفز :
متجبجب اخوى الجكس مالى ومالو
الراس انصلع وسنونى وقعو ومالو
اتكرفش وشيش بالغت فى اهمالو
ماتثير الشجون خلى القليب فى حالو

الودكى:
مافى راجلاً مهرو تمة......... ضروس
واولاد الزمن حلقوا الصلع مخصوص
شجون القلب اهم اصلو القلب مقصوص
خلى الوش على (فد) ساونا ببقى عروس
متنرفز
:
متجبجب اخوى انا زول بقيت مهووس
طول اليل اهضرب وبالنهار ممغووس
لا حالاً يطمن لا فرح لا فلوس
حفيان ماشى لقدل فى الفيافى اكوس
الودكى:

المغس العليك نسبة .. وقليل كمية
والهضريب عمتنى والجاكة منو شلية
والمغس البشقق ديمة كامن فية
والفلس المرابط ديشو قايدو عطية
متنرفز :
المغس العليك والله ماهو شوية
فات زمن السعادة وماهو ناوى الجية
زى حالى العلى مغصاً يشقق كية
خلى قليبى فاحت منو ريحة الشية
الودكى :
الكى العليك ياحمدى عندى متالت
والدة وبت وزوجة .. مجمل نعايم زالت
ريحة الشية والعطراب على اتخالت
ضحكت على دنياى لامن بالت
فقدالوالدين والابنة وام العول
لا بنشال ولا بنخت ولا بنفع معاهو القول
اكان الزايلة الزايلة دامت من قبل لى زول
.. كان ابو فاطنة يقدل فيها لادة الحول
متنرفز :
متجبجب اخوى انا داير اقولك قول
اصلو الدنيا زايلة وما بتدوم لى زول
والايام بتجرى الحول يسك الحول
زى رمشة عيونك بس تقول مس كول
الودكى :
قول حمدى اللبيب مابنعقب بى قول
وعارفَة ام قدود نقادة القندول
نقدت حبتى خلتنى زول معلول
متخترىالدرب واقف تقول همبول

منقووووووووووووووول