الرفــــــــــــــــــــــــاعيين - بقلـــــــــــــــمي

الــــــــــــرفـــــــــــاعيين

بلدي إشتقت ليك
شوق شديد
طول السنين
اللذت بيه منك بعيد
إشتقت لي رملة
جروفك وخضرتك
إشتقت لي موية
نيلك وضحكتك
وإشتقت لي لذيذ
ثمارك وبهجتك
النيل حاويك من وراك
زايدك جمال فوق فرحتك
ما عاشقك براي كل الولاد
عشقوك كمان رضعوا الحنان
من طيب ثمارك وخضرتك
وإشتقت لي طيبة الاهل
ضحكة ولأدك ومزحتك
حتى الشجر نرميه بكل القساوة
من حجار يدينا من طيب ثمارك ومنقتك

*********

صباح الخير عليك يا بلد
صباح مليان عشق
صباح مليان حنين
على كل الرفاعيين
بشوفو في عيون ولأدك وروضتك
حتى الكبار شايلين الدفاتر ماشين
المدارس طالبين العلم لي رفعتك
وحتى المزارعين قايمين الدغيش
سادرين الخلاء كايسين لقمة العيش
لعزتك
عشان ما تهوني إنتي في يوم
وسط الخلق
ونفقد كمان لي هيبتك

******

يابلدي الغربة أدتني الجفا
شالت العمر وأدتني العذاب
حتى الحرف الهيمت بيه
مني إختفى
وأداني الصدود وعدم المعرفة
لكن براي كل القصائد الكتبتها
فيه مزقتها
والفي المخاض ما شافت النور
من أحشائي أجهضتها
وحتى الحروف الفي القليب
ما إتشكلت حرمت القليب ما يبوح بها
ولو باح بها وكان الغلط
جففت القلم من
المداد عشان
القلم ما يخطها
وكان الحزن وكل الجروح المن
زمان والدوبا جاءت فتقتها

******
يلا أنزف يا قلب
إنت العشق ما بتعرفوا
ما قدرت تعرف وين يكون البعشقك
حرام عليك
حتى العيون من الدموع إتجففت
وحتى الجسم فقد إحساس الالم
من كثرة جروحك وأهتك
وحتى القلم مل الورق
وحتى الورق مل الانين
الكاتمه في جواك سنين

****
يا بلد قررت أجيك
وأدفن جروح قلبي
النازفة من جور
السنين
وقررت أجيك وأنا مشتهيك
وانا بالجد مشتهيك
ومشتهيك