حلمنتيشيات راااااااااااائعه

فات الأوان

آه
آه علي قلبي و علي املا حملتو دهور
قطعت بحور
سواد الليل علي ليلين
صبرت كتير و راجي النور
يا قطعة البلور
يا رنة الطنبور
يا سستر بنات الحور
يا صاحبة مسز شنتور
ويا قصبة جروف اهلي
عليك إسم الله يا حاكم علي ما تجور

--------------

شفتك يوم عجبتيني
قلت اقول أنا الفي أولي داير اخطب
ده ما معقول !!
بقيت ساكت و فرحان بيكي
احدث زول و أدس من زول
دا عادا حبا أصيل و عريق
لف و دار عليهو الحول
لكن صحيح الدنيا ما بتصفي و تروق للزول
لو ربطوا المعاك محلول
أتقدم و اتراجع و اتردد
لمن حصل محصول
إتمحن وقف
فكر مشلول قليبي المكيل بالملح مكيول

--------

يا لينة يا شتلة فريع البان
يا املا بنيتو عليك و عشت زمان
أفكر فيهو لمن بان
بقيت للحسرة و الآهات
يا درة دامر المجذوب
يا زينة الطالبات و يا امل السنين الفات
ويا طفلي الرضيع المات
إتحسرت اتبهدلت ما خليت
ودمع العين نزل
وكت قات لي oh too late !!
ضيعني الدكتور عشا البايتات
وعاد خطبوكي لزولا عريض و كبير
وعلمو كتير و لابس ليهو نظارات
عربيتو تسوي حي وا ليل
وحافظ الكيميا في راسو
و حاكي أشنابو نص رباط
و عاد شغال و حالتو كويسة باني البيت
رضيتو بيهو طوالي
و ما قولتيلو oh too late !!

------

بعد الحصل قات لي : يا مولانا ادعو لينا معاك
يجازيك الله يا فلانة !
زماني و فات و دايراني اجيب أبريقي و أتوضا
و أفرش الفروة و اتمسكن و أصنقر ليكي للدعوات ؟
زمان ما كنت بدعوليك و افكر فيك
لكن الليلة بدعو عليك
بركة الله و كيتاً فيكي يا فلانة
أبوك لا يرضي لا يخاطر
ومما تجيبي شوط الخطبة في خشمك
يعاين ليك و يحمر فيك يتكربن
يشيل كرباجو يتكرب
ومسكك من طريف التوب
طرفو الطويل نازل حدا العرقوب
و أمك عاد تقول حي ووب
و تتعارض
سجمنا الليلة يا أبو فلانة !!
يقول ليها يا فلانة
كان عارضتيني طلقانة
تقولو لا لا خليتك براك زعلان
و تقعد تج و يجرك كر علي الديوان
وتصرخي جآك بلا خجلة التقول شيطان
لامن يسمعوا الجيران ينطوا الحوش يدقوا الباب
ويطانش تقول طرشان
يكسروا الباب يدخلوا عليه
يقول ليهم : حلفت يمين البصلني قريب هدي السكين !
يزحوا بعيد يختوا الخمسة في الإتنين
وتسمع جيت و تسمع واي و يا با كفاي عليك الله !
وتسمع جو و تسمع حي و حي حي حي و حي حي ووب !
وتسمع جيت و تسمع واي و يا با كفاي
وتسمع جو و تسمع حي و حي حي ووب !
وتسمع جيت و تسمع واي
وتسمع جو و تسمع حي
وتسمع جيت وتسمع جو ديميعاتك يصبن جو
و أمك برة تنبح هو!!
وقت ينقطع سوطو و تفتري تب
يملص ليكي مركوبو
يقول فيك كب
يمسكك طب
و يكفتك طاخ
ويكنكش فيك
يخنقك خنقة بت الكلب

-----------------

المسروق

يعيقك الله يا مجرم
كيف اسع بتسرقنى ؟؟؟؟
تسرقك بطنك انشاء الله تخليك ديمة متألم
حضيرى انشاء الله يبراك فلسا للجيوب يخدم
والعطش اليحرق الجوف يخلى الفقراء قايمه وقاعده ليك تعزم
تعيقنى انا ؟؟؟؟؟؟؟
يعيقك الله يا مجرم بي مدفع كلاشنكوف
يواليك فى المسيمع عاد يخليك لا سمع لا شوف
شايل حقنة حارقة معاهو يحرق ليك قلبك وكبدك حتى المعدة والشرشوف
تعيقنى انا ؟؟؟؟؟؟
نان بالله لو سألوك نان عميان من الاسواق ؟؟
تسوق اروتى فى ساقى تورا يقطع الخناق
تسوقلك داف تدقشو ترلة فى عقبة يخليك لا ضهر لا ساق
نان بالله لو سألوك ماك عارف القروش بى وين ؟؟؟؟
ناس بانين عمارات كيف وناس راحات وناس تخزين
حكمت تجينى انا المسكين البلقط بى قرش قرشين
تقرشك عقرباً تلقاك فوق الريق يكون جسمك مرطب تب
تقرشك سموم الصيف تخلى وشيك قايم حب
وقرشا يبلعك يلف بى جدة والصومال
يجيبك لينا تانى هنا يرميك فوق الرصيف
يسلب لحمك الفوقك يخليك بس عضام وعصب
تعيقنى انا ؟؟؟؟؟؟؟
تطرشق لى برنامج اخطط فيهو ليا سنين
يطرشق فيك كمبرسون يخليك انت بس ساردين
ويطرشق فيك بتوجازاً يكون جنبك صفيح بنزين
وترقد ما نشوف زولا يقول لنا ماشى فى تحسين
تعيقنى انا ؟؟؟؟؟؟؟؟
كمان تسرق ملاياتى المن كيسها ما انفكت ولا عارف نقوشن كيف
يفككنا منك الله اليوم قبل باكر يخليك لافّي صيف وخريف
يفك ضلعك يفارقك عقلك تسك الماشى فوق عدلك
زى جملا غشاهو الزيف
نفسك فاتحى ترقد فوق ملاياتى ؟؟؟
ترقد يابا فوق عنبر نصيحو يشابى كايس ايدو
وترقد يابا فوق قبرا اعوذ ربى من هولو وعذاب سيدو
ترقد يابا فوق غرفة تكون مفروشة بالصرفة ونملها يخمو بالقفة
لا تشوف جنة بى عينك ولا بى عتبه تتعتب
عشان عملك تملى كعب
تسرق الجيب وتسوى العيب وانت حرامى ود الكب

--------------------

الجردل

بسم الله .. فتحت الباب
وجمب الباب وقفت شوية في الشارع
وباب جيرانا كان مفتوح وظاهر انو زول طالع
وخلف الباب لمحت التوب
بلعت الريق .. لأني كتير بعرف التوب
وجوة التوب لقيت الزول
وظاهر انو دة المحبوب
معاه الجردل المليان
أكيد الموية مقطوعة
***
حرام والله ألف حرام
حرام الزول يشيل جردل
ويقطع ميل عشان حمام
حرام والله الف حرام
****
عليكم الله شوفوها
وعشان عينيها ساعدوها
وعشان محبوبتي مابتقدر
تشي الموية في جردل
*****
عليكم الله شوفوها
مبهدلة كيف مع الجردل
تشيل حبة وتخت نفسا
وتخت حبة وتشيل نفسا
وتخاف من توبا يتبلبل
وتاخد لفة الشارع
وكل الشافا يتبهدل
عليكم الله شوفوها
معذبة كيف مع الجردل
****
حرام ياموية الف حرام
**
كرهت الموية من البلف حتي الدش
ومن بابور مياه الحلة
حتي الهيئة
والماسورة
والنافورة
والصهريج
وموية النيل
وموية الزير
وخرطوش كابي في برميل
وحتي الغيمة لما تشيل
****
عليكم الله شوفوها
معذبة كيف مع الجردل
**
تشيل حبة وتخت نفسا
وتخت حبة وتشيل نفسا
وبلدنا النايمة ليها سنين
تشبع فينا من بالمغصة
وعيون نيلنا النبع من فوق
بتتفرج علي المغصة
وغيوم بلدي المشت من فوق
بتنزل وين ؟؟؟
بتنزل في كروش نجسا
ومطر بلدي النزل من فوق
بينزل وين ؟؟
بينزل فوق جناين سيدي يسقيها
وبينزل فوق عصافير الهوي السكنت
جناين سيدي يرويها
ومطر بلدي النزل من فوق
حينزل يوم ...
ونيل بلدي المرق من ضو
حيمرح يوم
وغيم بلدي الشرد ياناس
حيرجع يوم
وبت بلدي البكت في يوم
وضاقت وجعة الجردل
حتملأ الدنيا بالزغرود
وتنسي حكاية الجردل